A ranar Lahadi takwas 8 ga watan Janairu na shekarar 2023 ne kungiyar yakin neman Zaɓen Dantakarar Shugaban ƙasa na jam’iyar APC Bola Ahmed Tinubu da na Gwamna Dakta Dikko Umar Raɗɗa mai suna “Asiwaju Gwagware gida-gida Initiative” ta shiga Ƙaramar Hukumar Ƙafur da Malumfashi bisa jagorancin Alhi. Aliyu Ilu Barde ta raba kayan haihuwa ga Mata masu juna biyu, da kuma gudumawar kayan masarufi da ta saba rabawa a Masallatai da tsangayu.
Da yake jawabi a wajen rabon kayayyakin Haihuwar a Babbar Sakatariyar karamar hukumar ta Kafur shugaban kungiyar Hon. Ali Ilu Barde ya bayyana irin kirki da halaccin Alh. Kabir Ibrahim Masari wanda yace shiyasa ma Dantakarar Shugaban ƙasa Bola Ahamed Tinubu ya zaɓeshi a matsayin mataimakin sa na wucin gadi, yace Amanar Mutum kesawa ayimasa wannan gatan. Ya bayyana cewa a halin yanzu Asiwaju bashi da Amini na kusa gareshi kamar a Arewacin Najeriya kamar Kabir Masari Duk inda yake suna tare, inda ya dauke kafa nan Kabir Masari zai aza tashi. Yace ‘Yan Kafur kunyi Ɗa da muke saran idan kuka kokarta kuka fitar dashi kunya a zabe da za’ayi a nan da wata daya, kuka zaɓi Bola Ahamed Tinubu tabbas kuna da Babban jigo a Gwamnatin tarayya da zaku samu gagarumin cigaba ta dalilinsa.
Da yake shugaban jam’iyyar na kafur ya bayyana jin dadinsa da godiya ga wannan ƙungiya ta Ɗansu da ya Assasa kuma yace ba a yakin Neman Zaɓe ba kawai kungiyar tafi maida hankali ga taimakon Al’umma yace suna godiya, ya kuma yi Addu’ar Fatan Alkhairi da Nasara akan zabe mai zuwa. Itama shugabar mata ta jam’iyyar a karamar hukumar Kafur tace ita a saninta babu wani wanda yake tare da Kabir Masari da ya tako har mahaifarsa ya taimakesu, inba Alh. Aliyu Ilu Barde ba, tace sungode kwarai kuma zasuyi duk iya kokari da dabarbarinsu na mata don jawo hankalin sauran ‘yan uwansu domin fidda Dansu Kabir Ibrahim Masari Kunya da ruwan kuru’u a zaben shugaban kasa da na Gwamna a ranar zabe.
Bayan wannan bada Tallafin ga Mata Ɗari masu juna biyu, Hon. Ali Ilu Barde ya yi ziyarar Zumunci zuwa gidan su Kabir Masari don gaida Mahaifiyar tsohon Dantakarar Mataimakin shugaban kasar a cikin garin na Kafur.
